Danis - Tavanasa
Hier kam der Erdrutsch runter
Entginas notizias da Danis-Tavanasa / part 1
(scret schaner 1985 da scolast Salvator Caduff)
Tavanasa
Lein entscheiver entadem Tavanasa.
Danunder ch'il plaid Tavanasa derivi hai jeu dumandau inagada in pfilolog, mo quel ha era buca saviu declarar la derivonza da quei plaid. Tavanasa compara gia sin ina carta geografica ord il temps dalla fundaziun dalla Ligia Grischa a Trun, pia entuorn 1424. Il plaid Tavanasa screts sco oz.

 

 

La finiziun da Tavanasa, pia la part oxidentala dil vitg, nua ch'il stradun cantunal meina a Trun e la via, oz veglia, che va a Sursaissa, leu steva avon la bova da 1927 sper la val dil Lochli la casa dalla familia Alig. Ils Aligs, sco els vegnevan numnai generalmein, fagevan ils bransiners. Quei intressant mistregn exercitava il bab Sep Antoni e siu fegl Toni. Els culavan bransinas grondas e pintgas, dallas qualas il mistregner controllava il tun. A Glion ei marcau e nos bransiners prendan in buordi brensinas si dies e van a marcau fagend leu venal ellas als purs.
 
Sper il mistregn da bransiner eran ils Aligs era passionai pescadurs. Els ein stai a Tavanasa ils emprems pescadurs che han pescau cun la corda. Pli baul vegnevan ils peschs pegliai cun la rischa ni cun la reit (il bier). Il Toni Alig, in umet pign, haveva pegliau enta Dautras, nua che l'ovra electrica Rein Anteriur ei oz, in scarun da 18 funs.
 
Oz ei situaus dadens la val dil Lochli il kiosk, mess en pei e menaus da Balzer Derungs-Zortea p.m. ed oz (1985) cuntinuescha dunna Brida Derungs-Zortea ensemmen cun la sora Dumenia Derungs-Zortea il traffic dil kiosk.
 
Ussa passein nus la val dil Lochli en direcziun orientala. Gie quella val, che ha ils 25 da settember 1927 caschunau a Tavanasa la terribla nunemblideivla disgrazia. Giudem Sursaissa era in baghetg, sco ei vegn detg in mulin, sbalunaus en la val e reteniu si quella, che menava quei di extraordinarîamein bia aua, in di che pluveva sco derscher cun sadialas. Anetgamein sederscha l'entira bova cun ina forza sfrenada scarpond e raffond tut quei ch'era en la val ni dasperas tochen giu el Rhein, il qual era quei di tut aparti gronds. Quei terribel eveniment ha cuzzau mo paucas minuas, mo schau anavos in aspect nunemblideivel.
La part oxidentala dil vitg ei totalmein devestada. Treis casas habitadas, in baghetg d'economia e dus clavaziels, la biala punt, che menava sur il Rein vi a Danis, construida igl onn 1905/06, il stradun cantunal Tavanasa-Trun e la lingia dall via-fier retica. Mo il pli sgarscheivel ei che quei eveniment ha custau la veta a siat vischins da Tavanasa, numnademein a Bartholome Zortea, ristaler 1859, Sep Antoni Alig, bransiner 1852, sia dunna Turté, 1862, il fegl Luis Alig, miradur e surprendider 1894, ils dus frars Jodocus, 1911, e Nicolaus, 1912, Caduff, fegls da Clau - Albrecht, la dunna Parpan, 1890, dunna dil guarda lingia, che fagieva ual il survetg d'arver e serrar las barieras leu nua che la via Tavanasa - Danis traversava la lingia dalla via-fier retica per ir sur il viaduct. Las treis casa appartenevan: ina alla famiglia Alig, bransiner. Quella era situada senisester digl ual nua ch'ins mava a Sursaissa. L'autra casa steva visavi dretg digl ual ed era habitada da dunna Cristina Nay, ina matta els onns e steva persula. La tiarza casa steva giudem dretg digl ual, nua ch'ins traversava la lingia dalla via-fier per ir vi punt. Quei era la casa dils "Naglers" ed apparteneva alla famiglia dil Clau Caduff-Albrecht. Cheu steva avon onns in fravi da guotas.
Damaneivel dalla val stat aunc oz la casa dalla fam. Beer-Maissen e Maissen-Schädler. Ina casa da mir zun massiva, baghegiada a sias uras d'in signur Latour da Breil, ch'era staus ambassadur en Spagna ed aquistada pli tard da Rest Giusep Maissen da Capeder. Ina casa cun in intressant vargau. Quei sgr. Latour haveva treis feglias zun intelligentas e svagliadas. Sco nos antenats raschunavan mussavan quellas cun plascher teater alla giuventetgna da Danis-Tavanasa. En la habitaziun sura da quella casa existeva ina ualti vasta sala, la quala era ornada cun maletgs spagnols . Las treis dunschalas Latour ein lu buca maridadas a Tavanasa. Ina duei haver maridau in signur Peterelli, cusseglier dils stans, ina in signu Escher von der Linth e la tiarza in signur Lavater da Turitg ord la parantella da signur Lavater, anteriur dirigent dalla Ligia Grischa Glion.
Anfangs Dorf (West) wurden einige Häuser 1927 durch eine Schlammlawine verwüstet, 7 Tote waren zu beklagen.
Dieses Haus, seit vielen Jahren nun von Familie Beer bewohnt, wurde damals verschont. Das Haus wurde von einem Latour gebaut, dessen 3 Töchter im oberen Stock eine Theaterbühne für die Einheimischen führten. Die spanischen Fresken (Bilder) sind noch heute (2006) gut zu sehen.
Der Name Tavanasa  kann man bis 1424 zurück verfolgen (Museum Ligia Grischa, Trun) . Ab 1900 lassen sich dann erste Dokumentationen finden

Hinweis: Bartholome Zortea wurde auf Romanisch scheinbar Barclamiu genant, auf der Tafel steht "Barclamin".