Danis - Tavanasa
Entginas notizias da Danis-Tavanasa / part 10
(scret schaner 1985 da scolast Salvator Caduff)

Lein buca star memia ditg e cuntinuar nies viadi suenter la val cuschina si, lu cattein nus puspei ina casa d'ina anteriura industria. Ella secatta sper igl ual, gest sut la punetta dalla via che va a Breil. Igl ei la casa che ei oz en propriertad dil cusunz Franz Friberg. Cheu eran ils coluraders Fribergs da Danis a casa. Ins numnava els semplamein ils "Färbers" da Danis. Teilas e teilas ein cheu vegnidas coluradas e spedidas pils vitgs entuorn. Donn che quels indrezs ein oz spari.

Fotos muss ich noch suchen!

 

Fotas stos jeu aunc enqurir!

Fotos muss ich noch suchen!

 

Fotas stos jeu aunc enqurir!

Avon che la via che va a Breil banduni il vitg entupein nus en mintga cass la pli veglia casa existenta dil vitg. Ella datescha ord il 16avel tschentaner ed il proprietari ei oz (1985) Ton Berther-Castelli. La scheina dretg dalla via che va a Breil ei il Pustget. Seniester dalla via principala havein nus la via da Dautras da pli baul, oz (1985) la via che meina alla centrala elctrica Ovra electrica Reinanteriur. Quella via survescha naturalmein per uni la scheina da Tumvi cul vitg. La scheina Tumvi ei vegnida eregida ils onns 1957/58 dalla Ovra electrica Reinanteriur, principalmein per dar tetg als emploiai.

In tec su la punt, era sper igl ual in buca ton grond baghetg, quei era ina breneria. Cheu vegneva barschau vinars ord meila, péra e tschereschas.

Ussa turnein nus giudem Danis. Igl onn 1924, ils 8 da november, ei era entuorn las quater suenter miezdi, ei quella part dil vitg daventada in'unfrenda d'in grond barschament. In triep casas e clavaus ein i si en tschendra. Quei ei stau per da quei temps gronds donns. Mo co veseva quella scheina ora. Ils baghetgs eran baghegiai schi datier in a l'auter. Cura che nus vegnevan cun la canastra fein giu da clavau riscavan nus da survegnir l'aua dalla svidera dil vischin giu pil dies. Tschun casas e plirs clavaus ei stau l'unfrenda dil barschament. Ina suletta casa da quella scheina, situada il pli giudem Danis, ei vegnida schanegiada dal barschament. En quella casa secatta oz (1985) la Cassa Raiffeisen Danis-Tavanasa, fundada 1945 e menada dapi l'entschatta tochen oz (1985) da nies administratur Eusebi Friberg.

La scheina da giudem Danis ei els onns precedents puspei vegnida eregida, mo tut sin in'autra pli emperneivla e pli biala moda. Daco il barschament ei succedius ei buca vegniu alla glisch. Nus boubs, jeu (Salvator) mavel ella 5avla classa, havein stuiu ir la proxima dumengia suenter-miez di en casa da scola cun nies scolast Bistgaun Fidel Cathomen e scriver in conzept sur dil fimar. Pli tard ei il vitg da Danis aunc vegnius tuccaus duas gadas da barschaments, mo da pli pintga dimensiun.