Danis - Tavanasa
Entginas notizias da Danis-Tavanasa / part 11
(scret schaner 1985 da scolast Salvator Caduff)

Giudem il vitg Danis ei la plazza dallas scolas. Il scribent da questas lingias e notizias sa seregurdar da treis edifecis da scola.  Igl emprem baghetg era situaus empau sil hodiern Cadruvi ed in ton el hodiern curtgin pervenda. Igl onn 1883 era el construius. Ei era in baghetg fetg sempel; el plaun-tiara in tschaler per deponer la lenna da scaldar pegna, sur il tschaler igl emprem local da scola, sur quel il secund local da scola, sisum il surcombras e da vart orientala las comoditats. Igl onn 1920 era il diember da scolars carschius taluisa, che la vischnaunca ha stuiu conceder a nus ina tiarza scola. Quei era la scola superiura ed ei vegnida plazzada el baghetg dalla cascharia, nua ch'il restaurant "Italia" era da casa duront che la via-fier retica ei vegnida baghegiada. Igl emprem scolast dalla scola superiura ei stau Sep Mudest Nay. Ils onns vargan ed onn 1938, pia cuortavon la secunda uiara mundiala, eregia la vischnaunca da Breil ina nova casa da scola per Danis-Tavanasa (Fota su, seniester)

Das Foto oben habe ich restauriert, es entstand 1939. Man kann noch gut das Schulhaus links erkennen.

Das alte Pfarrhaus musste 1974 dann entgültig ersetzt werden!

Ils daners eran scarts e per gidar il finanziar la nova casa da scola dueva il baghetg vegl da scola vegnir vendius en mauns privats. Buca tuts ils vischins da Danis-Tavanasa eran cuntents da quei. Sin ina iniziativa privata rimnan ins daners e contonscha la suma, che la vischnaunca quintava per confinanziar igl edifeci niev. Il baghetg da scola dataus ord igl onn 1883 vegn ussa spazzaus e Danis-Tavanasa obtegn in bi e schuber areal damaneivel dalla baselgia. La casa da scola da 1938 ei vegnida eregida seniester dalla via che va a Breil. Per segidar cun la finanziaziun han la societad da musica, chor mischedau e cumpagnia da mats prestau lavur gratuita. Il baghetg cumpigliava 4 stanzas da scola, 2 stanzas pli pintgas, in per exercezi da cant e musica e l'autra per scola da lavur, giudem la sala cun tribuna e sisum la habitaziun dil pedel. Igl edifeci ei ina ovra architectonica digl architect Coray da Laax.

Puspei porta il temps novas relaziuns;

Las scolas secundaras e manualas dalla vischnaunca da Breil vegnan centralisadas a Danis-Tavanasa e nossa casa da scola da 1938 ei puspei memia pintga. Sper quella sesaulza ussa in niev edifezi, in baghetg modern.

Quella cumpeglia ina spaziusa sala da gimnastica e conzerts, ina gronda cuschina, ina aula per cant e musica e radunonzas, ina stanza per ils scolasts, ina stanza per instrucziuns da fisica, ina stanza pil vischinadi, tschun stanzas per l'instrucziun da scola ed igl areal giufuns survescha sco indrez pil schurmetg civil. Il baghetg ei ina ovra architectonica digl architect Brosi da Cuera. Igl onn 1976 han ils scolars e scolasts saviu intrar cun grond plascher el niev edifeci. Cun caschun dalla inauguraziun dalla nova casa da scola han ils chor reuni, il chor mischedau profan ed il chor mischedau da baselgia produciu la suandonta cantata cun text creau special per quei intent da scolast secundar Pieder Antoni Livers e cumponida cun accumpignament da clavazin medemamein extra per quella festivitad dil musicist Armin Caduff.

auf das Foto klicken

auf das Foto klicken