Danis - Tavanasa
Entginas notizias da Danis-Tavanasa / part 3
(scret schaner 1985 da scolast Salvator Caduff)
Sper via che va alla staziun da via-fier stat¨la pli veglia casa da Tavanasa, oz en proprietad dalla famiglia dil barbier Alexi Schuoler e dalla famiglia digl anteriur viturin Christian Caduff. La part orientala da Tavanasa ei en l'emprema mesadad dil schenivavel Tschentaner, entuorn 1830, daventada l'unfrenda d'in barschament.
Buca lunsch naven
habitava nies calgier, igl Alfons Carigiet. El pinava nos calzers bunamein per nout.
fota 2005
fota 2005
Ussa arrivein nus tier ils fravis. Treis generaziuns han fatg ils fravis; numnadamein Adalbert Nay, Toni Nay e Albert Nay. Cheu ei vegniu enfarrau biars cavals e fatg péz a bia puntgas. Ils fravis era adina marvegls. Cheu vala la canzun; il fravi ei allerta, marvegl tun'l marti.
sperel da survengir da tutas casas menziunadas zacu fotas veglias!
Hoffe, dass ich mal Fotos aus der damaligen Zeit hier platzieren kann! Wer hat eventuell welche oder kennt Familien, die aus früherer Zeit noch Fotos aufbewahrt haben??
Gest sper il fravi steva il roder, nies bien Giacun Giusep Muoth. El construeva cars e sliusas ed il fravi dasperas enfarrava ils carpiens. Visavi il roder, sut la via cantunala vegnin nus tier nies anteriur pasterner Barclamiu Beer ed ella medema casa siu frar il viturin Gion Andriu Beer. Il pasterner Barclamiu Beer era staus en Frontscha e meinsvart raschunava el da sias aventuras a La Rochel. Aunc in pass e nus stein avon la Helevzia oradem Tavanasa. Cheu habitava Gion Francestg Caduff-Friberg, il tat da nies actual (1985) canzlist Urban Caduff. Sper igl empalar l'ustria la Helvezia, haveva el aunc in indrez da barschar vinars. Gion Francestg e pli tard siu fegl Giusep eran pia ils brischa-vinars da Tavanasa. Meinsvart tugnava il Giusep: "La puma dalla vart sulegliva dat ora pli bein vinars che quella da Tavanasa."
Avon che bandunar Tavanasa vegnin nus tier nies ristaler Bartholome Zortea. El era vegnius alla entschatta dil 20avel tschentaner ord in vitg cul num Zortea el Tirol e secasasus dil temps ch'ei vegneva baghegiau la lingia da via-fier retica Glion-Muster a Tavanasa. Ils monis e ristials dil ristaler Zortea havevan in bien num, els purtavan ina marca renconuschida d'ina exposiziun ch'il ristaler Bartholome haveva aquistau. Bartholome Zortea, ch'ei morts entras la disgrazia dalla bova 1927, haveva mo in fegl Giusep, nis sco el vegneva numnaus il Sep Zortea. El haveva tschun feglias ed ei morts 1940. La fatschenta da ristaler ei denton buca ida a piarder.
Giusep, Sohn von Bartholome Zortea.
Giusep Zortea ha giu in emprendist, il Giusep Friberg, che ha fabricau ils ristials vi Danis, denton buca ditg. El ha era giu in emprendist, il Giusep Spescha, che meina aunc oz (1985) la fabrica da monis e ristials oradem Tavanasa (giest la casa suenter casa Zorteas, I.D.).
Dado Tavanasa sper la val dil Tschart, sur il conduct dalla via-fier, leu steva la pélla. Cheu pisavan ils gerbers las scorsas cun agid dalla forza d'aua avon che la forza electrica arrivi a Tavanasa.
Sut il conduct dalla via-fier retica era nossa resgia, che ha fatg bia survetschs als da Danis-Tavanasa. Ils vischins vegnevan cheu cun lur lena ord igl uaul e cheu vegneva quella resgiada tenor las mesiras indicadas per in prezi raschuneivel. A sias uras apparteneva quei edifecci ad in Luzi Cahenzli darivonts da Siat, il qual haveva cumprau ella dil tat da Punt il Gion Andriu Beer. Suenter l'uiara da 1914 - 1918 ei la famiglia dil Luzi Cahenzli seretratga a Cuera e la vischnaunca da Breil ha aquistau la resgia e menau il trafic da resgia. La stad digl onn 1969 ha ei dau auas grondas, ei era la fiasta da s. Placi. In tschuat crappa ed ina sfraccada aua sederscha dalla val dil Tschart giuadora, devastond tut quei ch'era el vau ni dasperas. La pélla, il viaduct dalla via-fier retica e la resgia daventan unfrendas dalla malaura. Il viaduct dalla via-fier retica ei naturalmein puspei vegnius reconstruius, mo la pélla e la resgia ein svani per adina.