Danis - Tavanasa
Entginas notizias da Danis-Tavanasa / part 6
(scret schaner 1985 da scolast Salvator Caduff)

Nus varghein il kiosk e mein sur la punt vi, la quala ei baghegiada 1928, pia suenter la bova da 1927. Sche nus mirein sur la punt giu, vesein nus aunc las restonzas dalla punt devestada dalla bova. Sper quella via cattein nus ina casa-lenn. Quei ei la casa paterna dalla famiglia Beer d'entadem Tavanasa. In tec pli ensi sut la via che va a Danis sepresenta l'ustruia Sur punt. Ils anteriurs cussadents dalla famiglia Cathomas scrivevan aunc Catumasch.

En la scheina cattein nus aunc diversas casas, denter auter la filiala dalla banca cantonala (casa Gion Dietrich sur l'ustria e la casa "Frau Muoth" da lenn)

Contemplont la scheina da Punt astgein nus buc emblidar la caplutta dil Cruzifix, situada sper la via che va a Danis. Deplorablemein ei a caplutta veglia che steva ualti el medem liug e mirava viers il Rein vegnida destruida dalla nauscha bova 1927. Ella vegneva era numnada la caplutta da Sogn Clau.

Cuort suenter la bova han ils da Danis-Tavanasa puspei eregiu danovamein la caplutta, mo schau mirar ella viers igl oxident (sera). Duront la stad, il temps ch'ils muvels eran ad alp, pelegrinavan ils da Danis-Tavanasa la dumengia suenter viaspras en processiun cantond la latania da tut ils sogns dalla baselgia ella caplutta dil Cruzifix.