Danis - Tavanasa
Entginas notizias da Danis-Tavanasa / part 8
(scret schaner 1985 da scolast Salvator Caduff)

In zun impurtont datum ei per Tavanasa e Danis, gie schizun per l'entira Cadi ils 13 da fevrer 1955. Quella dumengia suenter miezi han las vischnauncas dalla Cadi cuncediu alla pusenta Ovra svizzera electrica septentrionala/orientala a Baden (NOK) d'explotar l'aua dil Rein per la forza electrica. Tut las vischnauncas dalla cadi ein separticipadas vid quella fatschenta ed oz (1985) secloma l'ovra "Ovra electrica Reinanteriur." L'aua dil Rein vegn menada tras in tunnel da 28 km naven da Tujetsch tochen Cahantscha e da leu cun gronda pressiun en la centrala a Tavanasa, ella acla dil Mettel. Era il terren da vart seniastra dil Rein, las Dautras, in liug historic ei daventaus "unfrenda" da quella gronda ovra electrica. Gie las Dautras, nua che 1799 ils delegai dalla Cadi cun Pader Placi a Spescha sentaupan cun l'armada franzosa da general Demont, in um romontsch, che haveva fatg carriera militara en Frontscha, e concludiu cheu in armisteci.

Bia lavur e gudogn ad indigens ed jasters ha quell'ovra purtau. Igl onn 1961 ei la centrala en funcziun e produzescha electricitad, che vegn trasmessa alla bassa tras ina lingia da 380'000 Volts.

Cun quei che Tavanasa schai schi datier dil Rein, eis ei da capir, che beinenqualin haveva, surtut pli baul dil temps ch'ils scaruns cursavan la stad dil Rein si ed igl atun engiuviars, la pissiun e la fleivlezia pils scaruns. In di da November mava il polizist da Tavanasa ora, e gest en quei mument vegn in gat cun la cua d'in scarun da scala giu. Tgei ch'ei deva quei di gentar e tgei ch'il polizist ha fatg, schein nus sura alla fantasia da quels che legian questas notizias.

Lorenz Derungs mit einem "scarun" (Rheinlanke, Lachsforelle)

Foto zirka 1950 herum

Ina caussa da Tavanasa lein nus buca emblidar;

Duront la stad disturba negin clar dalla glina il durmir dils da Tavanasa.

Ed igl unviern eis ei buca pusseivel da vegnir brins cul sulegl da Tavanasa.