Danis - Tavanasa
Entginas notizias da Danis-Tavanasa / part 9
(scret schaner 1985 da scolast Salvator Caduff)

Sche nus mein naven da Punt per la via che va suenter il Rein en, en direcziun oxidentala, arrivein nus prest enta Mulin. Cheu savein nus admirar co l'aua dalla val Cuschina, che pren sia entschatta si Plaun da Steilas, sbucca el Rein. Gie l'aua dalla val cuschina ha a sias uras prestau als vischins custeivels survetschs.

Avon onns era il mulin en possess dalla famiglia Maissen. Il bab dalla famiglia Maissen, enconuschents a sias uras per il Placi da mulin, ni il Placi muliner, in umet pign cun barba, in ver muliner. Siu successur muliner ei lu staus biars onns il Sep Mudest da mulin, siu fegl. Sep Mudest era in muliner cun bien humor e buca pauc originals. Nies muliner era ledigs ed ei morts 1954.

Ils artavels da Sep Mudest han lu vendiu il mulin a mat Luis Antoni Friberg. In tschupel onns ha il bien Luis Antoni aunc menau la fatschenta da muliner. Mo il bien Luis Antoni era buca ferms da sanadad e cun sia prematura mort ha la fatschenta da muliner priu sia fin. Onns ed onns han ils purs da Danis-Tavanasa menau il graun, il dumiec e la salin el mulin e lu suenter entgin temps saviu ir per la frina. Co savevan ins cun plascher tedlar la melodiusa melodia dil clip clap ed admirar il caminar dalla roda-mulin, messa en moviment tras l'aua dalla val Cuschina.

Suenter la mort da Luis Antoni Friberg ei il mulin puspei staus venals, ed oz (1985) eis el puspei en mauns d'in Placi. Il Placi Derungs da sisum Danis ha aquistau il mulin. El ei il Placi da Mulin, mo buca muliner, mobein vendider da maschinas ed uaffens da fier.

Fotos muss ich noch suchen!

 

Fotas stos jeu aunc enqurir!

Nus varghein il mulin suenter la val Cuschina si e cattein la casa dalla famiglia Bundi-Wolf, nus numnavan ella la casa dalla Balugna, aschia senumnava la dunna da Sep Antoni Bundi, emploiau da via-fier. Sut tetg dalla casa dalla Balugna secattava avon onns in pintga industria, quei era la scarsineria. Cheu vegneva la launa dallas nuorsas scarsinada, pia preparada per filar.

Vargond suenter la val Cuschina si vegnin nus tier la casa dils frars Derungs (Gion, Casper ed Augustin). Lur bab era il Gion Giachen. Els eran scrinaris ed havevan a sias uras era cavals per menar la lenna ord ils uauls. La maschina da splanar vegneva messa en moviment tras la forza d'aua dalla val cuschina. Il luvratori era ualti spacius. Gie quela schizun per munconza da sala surviu sco local da teater, e tgeinin; Il gerau da Schlans, da Alfons Tuor ha delectau nos antenats.

Gest sper la casa dils Derungs, oz (1985) stat leu in baghetg d'economia, era situada la casa da Mattias Nay, sco nus schevan igl aug Tuias. El era scrinari ed haveva il luvratori in tec pli engiu sper la val Cuschina.

Mo igl aug Tuias haveva era ustria, quei era l'antecessura dalla "Steila" a Danis. Cheu lein nus buc emblidar che quei ei stau la casa nativa da nies valent ed enconuschent scribent e poet Sep Mudest Nay, fegl da Mattias e Mariuschla Nay-Friberg. Deplorablamein ei quella casa era daventada unfrenda dil barschament dils 8 da november 1924.

Strusch vargai l'ustria da Danis vegnin nus tier la casa dils Bundis da Danis, oz (1985) en propriertad dallas soras Friberg.Quella casa havevan ils frars Rest Antoni e Mattias Bundi eregiu. Mattias e Rest Antoni ein denton buca vegni vegls a Danis.  Ils onns denter 1920 e 1930 han els vendiu la casa ed ein seretratgs naven. Mattias Bund ei ius dalla val Renana giuadora ed il Rest Antoni ei seretratgs vil Valeis. Leo Bundi, fegl da Rest Antoni viva aunc oz (1985) vil Valeis. El ei il tat dil renomau velocipedist mundial Dill Bundi.

Fotos muss ich noch suchen!

 

Fotas stos jeu aunc enqurir!